30.05.2025 - AKTIVITET TRAJNUES: “Kompetencat e gjykatave të juridiksionit të zakonshëm lidhur me çështje të veçanta të procedurës së arbitrazhit”

Shkolla e Magjistraturës, më datë 30 maj 2025, zhvilloi aktivitetin trajnues me temë: “Kompetencat e gjykatave të juridiksionit të zakonshëm lidhur me çështje të veçanta të procedurës së arbitrazhit; emërimi i arbitrave kur palët nuk bien dakord; marrja e masave të  përkohshme kur gjykata e arbitrazhit nuk është formuar ende; shqyrtimi i  kërkesës për anulimin e vendimit të  gjykatës së arbitrazhit.”, pranë ambienteve të Shkollës së Magjistraturës, në Tiranë.

Ky aktivitet u drejtua nga: 

Ekspertë: Dashamir Kore dhe Flutura Kola (Tafaj) 

Lehtësuese: Borana Mustafaraj

Qëllimi i këtij trajnimi është: të forcojë njohuritë dhe aftësitë e tyre lidhur me ndërveprimin ndërmjet juridiksionit të zakonshëm dhe arbitrazhit, duke u fokusuar në çështje të veçanta ku ndërhyrja e gjykatave është e domosdoshme. Trajnimi synon të sqarojë rolin e gjykatave në emërimin e arbitrave kur palët nuk arrijnë marrëveshje, në dhënien e masave të përkohshme në fazat paraprake të procesit arbitrazhi, si dhe në shqyrtimin e kërkesave për anulimin e vendimeve të gjykatës së arbitrazhit. Kështu, trajnimi ndihmon në sigurimin e një zbatimi të drejtë dhe efikas të ligjit për arbitrazhin, duke rritur cilësinë e vendimmarrjes gjyqësore në këtë fushë.

Trajnimi u realizua duke ndërthurur prezantimet (deri në 20-30 min) me diskutimin e çështjeve të shtruara (pyetjeve vetë studimore; pyetje-përgjigje) dhe ushtrimeve me raste praktike & kuize, për të nxitur dhe realizuar ndërveprimin aktiv të pjesëmarrësve. 

Gjatë këtij aktiviteti trajnues u trajtuan tema të ndryshme, si:

• Risitë e ligjit 52/2023 “Për arbitrazhin në Republikën e Shqipërisë”. Arbitrazhi kombëtar dhe ndërkombëtar;
• Juridiksioni gjyqësor dhe ai i arbitrazhit. Juridiksioni ekskluziv i gjykatave shqiptare. Klauzola e arbitrazhit (klauzola kompromisore) dhe vlefshmëria e saj;
• Kompetencat e gjykatave të juridiksionit të zakonshëm lidhur me çështje të veçanta të procedurës së arbitrazhit; emërimi i arbitrave kur palët nuk bien dakord; marrja e masave të  përkohshme kur gjykata e arbitrazhit nuk është formuar ende; shqyrtimi i  kërkesës për anulimin e vendimit të  gjykatës së arbitrazhit.

Në këtë aktivitet trajnues morën pjesë gjyqtarë, prokurorë dhe avokatë shtetit të Republikës së Shqipërisë.